Akersarv vidare i Ungdommens Kulturmønstring

August 2014 gjekk startskotet for Bygda Dansar Akershus, og 8. mai har dei premiere på midtførestillinga si på Kråkstad samfunnshus i Ski. Sist helg stilte dei til lokalmønstringa i UKM, Ungdommens Kulturmønstring i Enebakk. Som fire av 14 deltakarar gjekk dei vidare til fylkesmønstringa i april.

I Enebakk viste dei dansenummeret «Arven!» frå den komande midtførestillinga.

– Eg var utruleg stolt av ungdomane våre då eg sat blant publikum på søndag, seier prosjektleiar Mathilde Øverland. – Ungdomane viste ei danseglede som smittar over på alle i salen.

– På scena dansa vi seksmannsril, tango og halling med ein vri. Det var artig å delta fordi det var så mange forskjellige grupper, dansarar og songarar, og litt konkurranse er moro, fortel Ingeborg, ein av dei unge Akersarv-dansarane.

– Det var veldig gøy og hyggeleg å vere med, og opplegget rundt mønstringa i Enebakk var bra, seier Herborg, ein av dei andre dansarane. – Pappa har alt føreslått at vi stiller i open klasse på Landskappleiken til sommaren med denne førestillinga.

Bygda Dansar-gjengen var det einaste folkedansinnslaget, og sjølv om det var innslaget med minst personleg tilknyting til Enebakk, var det ikkje noko å seie på applausen frå publikum.

Bygda Dansar har jobba med å lære seg og utforske tradisjonsdansar frå rundt om i Akershus. Det er dette publikum vil få sjå på midtførestillinga i mai, med koreografi av samtidsdansar Marie Bergby Handeland.

– Vi valde Marie på grunn av begeistringa ho har vist for prosjektet og for arkivopptaka frå Akershus som vi har jobba med. Marie er ei audmjuk og spontan dansar og koreograf, det var eit lett val, fortel prosjektmedarbeidar Trine Merete Sjølyst.