Folksrevyen: veke 35

Siste helg med Löwensköldska Ringen på Västanå Teater

I Sunne i Värmland ligg Berättarladan, ei løe bygd om til storslegen teatersal. Sidan 1999 har Västanå Teater, leia av Leif Stinnerbom, framført dei årlege oppsetjingane sine her. Denne helga har du siste moglegheit til å sjå årets framsyning, som er Löwensköldska Ringen, basert på Selma Lagerlöfs roman frå 1925. Romanen og framsyninga er første del i ein trilogi, og dei neste to åra kan du sjå dei påfølgjande bøkene i serien dramatisert på Västanå. I år har du altså ein ekstra god grunn til å ta turen til Sunne!

Folksrevyen var og såg framsyninga i førre veke, og kan tilrå henne på det varmaste. I Berättarladan får du ei komplett teateroppleving, med ekstravagante kostymar, ei god og spennande forteljing, godt skodespel og ikkje minst: folkemusikk og folkedans. Teatersjef Leif Stinnerbom er òg riksspelman, og folkemusikken og folkedansen er alltid sentrale element i Västanå teaters framsyningar.

I Löwensköldska Ringen er musikken svært filmatisk – han ligg alltid i bakgrunnen, og fungerer som god hollywoodsk filmmusikk. Nokre av dei Folksrevyen reiste til Västanå teater med, sa rettnok at dei hadde ønskt seg noko meir variert musikk. Det har dei visst fått her tidlegare år – for den nyfikne kan CD-ar med musikk frå tidlegare oppsetjingar kjøpast i butikken på Berättarladan.

Folkedansen er òg sparsamt nytta, mest i overgangsscener når eit nytt karaktergalleri eller nye settingar blir presentert. Musikken og dansen held eit høgt nivå – og fordi framsyninga elles er så godt gjennomført, kan Stinnerbom og co. godt tillate seg å nytte desse elementa så sparsamt som de gjer. Ei stor oppleving er det, og det var mange norske bilar å sjå på parkeringsplassen tre timars køyretur frå Oslo.

Löwensköldska Ringen varar i tre timar, og midt i framsyninga er det ein matpause på 50 minutt. Det finst kafé med enkle rettar, men ein bør absolutt kjøpe billett med servering. Då får ein sitje i matsalen og ete dei lekre vinbladrullane med salat og brød til – eit lett og sunt måltid du blir mett, men ikkje for mett av. I matpausen når du òg å ta ein runde i utstillinga med Inger Hallström Stinnerboms kostymar frå tidlegare Västanå-oppsetjingar, som gir eit godt bilete av den allsidige produksjonen til teateret og kostymemakaren.

Folkemusikk og folkedans i september

Av andre arrangement som står for døra, denne helga og i vekene framover, finn vi:

– Dansefest laurdag 3. september på Fossedagene i Sollia, lengst nord i Hedmark. På det segnomspunne festlokalet Jomsborg speler først Tone Hulbækmo og Hans Fredrik Jacobsen konsert saman med sonen Alf, før Dugnadslaget speler opp til dansefest. På sollia.net finn du meir info om arrangementet og Fossedagene elles.

– Kvedarforum sitt Petter Dass-seminar finn stad på Ringve Museum i Trondheim denne helga, 2.–4. september.

– Sånn ska´ det være på Cosmopolite i Oslo 10. september. Per Olav «Skranglebein» Hoff Mydske leiar ein kveld der folkemusikk møter hiphop og alt kan skje. Mellom musikarane finn vi Steinar Ofsdal, musikarar frå Valkyrien Allstars og Sver-trommeslagar Jens Linell. Kanskje får vi noko i stil med videoklippet du kan sjå på venstre sida, der Skranglebein, Ofsdal og Anders Erik Røine jammar til beatboxinga til Droolian?

– Skuronnfest i Nannestad 10. september, med dansekurs på dagtid og gammaldansfest på kvelden. Dans hausten inn med Steinsgårdskroken, Syvers Orkester og fleire andre rytmekunstnarar!

– Munnharpefestival på Bykle Hotell i Setesdal 16.–18. september. Det blir konsertar, buskspel, gangardans og seminar – og sjølvsagt kurs i munnharpespel for nybyrjarar, halvgode og vidarekomne spelemenn, med kremen av norske munnharpespelarar.