Her er Folkelarmpris-vinnarane for året - FolkOrg - Organisasjon for folkemusikk og folkedans

Benedicte Maurseth, eidfjøre busett i Bergen, blei utnemnd til årets folkemusikar på Folkelarmprisen 2023.

«Med folkemusikken som kjerne, er ikkje vinnaren redd for å gå inn i nye felt, anten det er nye sjangrar musikalsk eller nye arbeidsformer. Vinnaren har ei evne til stadig å vere i endring og klarer å byggje solide kunstnariske prosjekt som står seg over tid», står å lese i grunngjevinga juryen har skrive om årets folkemusikar. Folkelarmprisane blei delte ut på Riksscenen på første dag av Folkelarm, torsdag 16. november.

Etter at statssekretær Even Aleksander Hagen offisielt hadde opna Folkelarm 2023, var det klart for prisutdeling. Den gjævaste prisen, årets folkemusikar, gjekk i år til Benedicte Maurseth. Som grunngjevinga til juryen antydar: Hardingen busett i Bergen er meir enn berre folkemusikar. På Osafestivalen i oktober i fjor sleppte ho Systerspel: om spelet som var og spelet som vart borte – festivaltingingsverk, bok og dobbel-CD. Her har ho dokumentert historiene til eit utal kvinnelege spelemenn gløymd av historia, og trekker linjene fram til i dag då kvinnene har ein sjølvsagd plass på folkemusikkscenene.

Statssekretær i Kultur- og likestillingsdepartementet Even Aleksander Hagen stod for den offisielle opninga av Folkelarm 2023.

Øyvind Sandum (t.v.), Bjørn Kåre Odde og Geir Byre tok imot prisen for årets dansespel på vegner av gruppa Madam Jam. 'Van danse' er debutplata til septetten.

Astrid Sulheim (t.v.) og Mari Midtli fekk soloprisen for plata si 'Skunde deg, jente', ei plate der dei vekslar på å spele og synge solo.

Plateselskapet Melovitten, starta av Solveig Brekke Hauknes og Bjørn Kåre Odde for berre to år sidan, stakk av med heile tre av fem moglege plateprisar. Både «solo-duoen» Mari Midtli og Astrid Sulheim (solo), trioen Atterljomen (trad. samspel) og det mykje omtalte og debatterte gammaldansorkesteret Madam Jam (dansespel) fekk pris. Elles fekk duoen Kenneth Lien og Center of the Universe (Heilo/Grappa) pris i open klasse, medan dokumentasjonsprisen gjekk til Men så kom Hauk Buen … (Talik), ei bok- og CD-utgiving som Hallgrim Berg og Per Anders Buen Garnås har stått bak.

Årets folkemusikkarrangør blei Telemarkfestivalen, medan Knut Utler fekk pris for årets folkemusikkfotografi. Til å dele ut prisane var Frank Rolland, Unni Løvlid, Thomas Nilssen og Terje Foshaug kalla inn, i tillegg til to av dei som sjølve fekk pris: Aslak Brimi (i Atterljomen) og Mari Midtli. Dei som sat i Folkelarmpris-juryen i år, var Johanne Flottorp (som òg er journalist i Folkemusikk), Åshild Vetrhus, Nina Fjeldet, Anders Lillebo og Per Midtstigen.

Statssekretæren (t.v.) saman med dei fleste av dei som var til stades for å ta imot Folkelarmprisar torsdagen på Riksscenen.

Leiar i Folkemusikk Nord, Terje Foshaug, var hanka inn til å dele ut prisen for tradisjonelt samspel.

Kenneth Lien (t.v.) og Jørgen Sissyfus Skjulstad (alias Center of the Universe), som vann prisen i open klasse, spela òg på prisutdelinga.

Asmund Buen (t.v.), Tone Nisi og Per Anders Buen Garnås, høvesvis son, enke og nevø av Hauk Buen, tok imot dokumentasjonsprisen for CD- og bokutgivinga om Hauk.

Folkelarmprisvinnarane

Plateprisane:

Solo: Mari Midtli og Astrid Sulheim – Skunde deg, jente (Melovitten)
Open klasse: Kenneth Lien og Center of the Universe – Snu hver stein (Heilo/Grappa)
Dansespel: Madam Jam – Van danse (Melovitten)
Tradisjonelt samspel: Atterljomen – Sjå ut (Melovitten)
Dokumentasjon: Hallgrim Berg – Og så kom Hauk Buen … (Ta:lik)

Dei andre prisane:

Årets folkemusikar: Benedicte Maurseth
Årets folkemusikkfotografi: Knut Utler
Årets folkemusikkarrangør: Telemarkfestivalen

Knut Utler med fotografiet han tok som blei kåra til årets folkemusikkfotografi 2023.

Trygve Liahagen, nyslått vinnar av Øyvind Berghs minnepris, spelte på utdelinga av Folkelarmprisen.

Telemarkfestivalen, dei siste ti åra leia av Kristoffer Mosfjeld, blei årets folkemusikkarrangør.