I 2023 feirar FolkOrg at det er 100 år sidan Landslaget for spelemenn vart stifta og Vossa Jazz feirar at dei har 50-årsjubileum! I det høve har dei to jubilantane slått seg samen og feirar med eit felles jubileumsband, som har fått det klingande namnet «Landslaget for spelemenn» etter ein ide av Asgaut Bakken.
Laurdag 1. april vart den aller første kampen for det nye landslaget for spelemenn spelt i gang! Sesongens første kamp føregjekk stort sett innanfor sekstenmetern i Voss idrettshall som ein del av programmet til Vossa Jazz 2023!
Landslaget sine sju musikarar hadde som venta sterk opning og spelte som planlagt på tvers av bana gjennom kampen. Det vart lita tid til å kvile mellom slaga for fleire av spelarane, då den eine musikalske utfordringa kom etter den andre. Publikum satt lydhørte heile kampen gjennom, og heiaropa kunne høyrast frå både golv og tribune.
Landslagskapteinen, Tuva Syvertsen, slapp å bruke det raude kortet, men ho bytta jevnt inn spelarar frå innbyttarbenken. Kirsten Bråten Berg stilte som første innbytar og trollbandt publikum med si praktfulle stemme og spenstige song. Tore Brunborg takka og heldigvis ja til å vere med på innbytarbenken frå Voss. Han er ein av dei mest etterspurte jazzsaksfonistar vi har i landet og det kan vi love at vi merka på landslagskampen i Voss. Det vart heller ikkje kjedeleg då tredje innbytar kom på scena, Stian Carstensen laga som venta show i kampen og fekk både medspelarar og publikum til å le høgt av songtekstar og høgtlesning.
Landslagskonserten har fått navnet «100 år med folkemusikk på 90 minutt». Forfattar og skodespelar Liv Gulbrandsen losa oss gjennom dei hundre åra frå Landslaget for spelemenn vart stifta og dei 50 åra som har gått sidan Vossa Jazz vart stifta. Liv leverte humor, alvor og historikk med ein outsiders respektfulle skråblikk. Vi vil gjerne høyre meir frå Liv og vonar ho får fleire speleminutt i neste kamp!
Dersom du ikkje fekk med deg Landslagets første kamp, vil du få anledning både på FØRDEFESTIVALEN i juli og på RIKSSCENEN i haust. Du kjem ikkje til å angre dersom du sikrar deg billett til ein av desse kampane!
(Foto: Runhild Heggem/Vossa Jazz)