Hei alle saman. 

Det er spennande å sjå på kva det faktiske medlemstalet vart når ein krysser målstreken for året. Det er gledeleg å sjå at folkemusikk- og folkedansfeltet er i vekst, og at antal medlemmer i FolkOrg nå har bikka 4700 enkeltmedlemmer. Det vil si ei auke på over 200 i 2024! Det er mellom anna ei stor auke av barne- og ungdomsmedlemmer. Vi ser at fleire og fleire nyttar dei mange tilskotsordningane lokallaga og faglaga har gjennom FolkOrg der utgangspunktet er antal medlemmer under 26 år. Og ikkje minst at førre landsmøtet vedtok at det skal vere rimelegare medlemskontigent for dei under 26 år. 

Vi er også glade for at vi har fått fleire nye lokallag gjennom 2024, nemleg Glopperaddane, Suldal spel- og dansarlag, Øyrafolk og Nesodden danselag. Velkomne inn i FolkOrg-fellesskapet! 

Nå er vi igang med rekneskap og årsmelding for 2024, og vi vonar å vere klare for landsmøtet i slutten av april. I tillegg til sjølve landsmøtet, så blir det nyttige seminarer laurdag formiddag, og ikkje minst dansefest på Riksscenen laurdagskvelden (og Tuvas Blodklubb utpå natta for dei som ynskjer det). 

På landsmøtet vil vi gjennom Eldsjelprisen nytte moglegheita til å heidre enkeltpersonar som har vore spesielt viktige i eit lokalmiljø. Og ikkje minst ynskjer vi med Lokallagsprisen å sette fokus på det gode arbeidet som lokallaga gjer, og vise fram gode førebilete for heile miljøet vårt. Vi vonar så mange som råd kjem til Oslo 25.-27. april. 

I desse dagar representerer gruppa HEKATE Noreg under Showcase Scotland, der vi avsluttar eit treårig samarbeid med Showcase Scotland Expo. HEKATE hadde showcase på Folkelarm i november og ga publikum ei magisk danseøkt - ei oppleving som gjorde arrangørane av Celtic Connections og Showcase Scotland ville ha dei dit. 

På denne vekas bilete ser vi HEKATE syngje til dans under Folkelarm. Det er stor interesse for dans om dagen! Neste helg er det DANS DANS DANS-festivalen, der FolkOrg er støttespelar. Dette er ein festival vel verdt å få med seg. Og så ynskjer vi å få fram at Landsfestivalen i gammaldansmusikk kanskje er det største dansefestivalen av alle - der er det dans frå 10 om morgonen til 2 om natta, kvar dag. Og så det kjem attendemeldingar om at dansen må stå enda meir i fokus også under både Landskappleiken og Folkelarm. Og det tek vi med oss, og lover at det blir enda meire både song til dans og dansespel i 2025! 

Vi ynskjer alle medlemmer ein god danse- og musikkvår! 

Helsing Aslak Brimi, dagleg leiar i FolkOrg

 

LOKALLAGSPRISEN OG ELDSJELPRISEN FOR 2025

Veit du om eit lokallag som fortener heider for arbeidet sitt? Eller kjenner du ein person som fortener heider og ære for sin frivillige innsats for folkemusikk- og folkedansmiljøet i Noreg? FolkOrg deler ut Lokallagsprisen 2025 og Eldsjelprisen 2025 under Landsmøtet 25. - 27. april. Les meir om prisane og nominer dine kandidatar her: Eldsjelprisen 2025 og Lokallagsprisen 2025. Frist for innsending av forslag er 28. februar.

LANDSMØTE I FOLKORG 25.-27.APRIL

Vi håpar så mange som mogleg får vore tilstades på årets landsmøte. Det blir i Røde Kors-huset laurdagen og søndagen, berre ein kort gåtur frå Riksscenen. Årsmøtemiddagen blir laurdag ettermiddag på restauranten Sudøst. Laurdag morgon blir det landsmøteseminar. Det blir eitt seminar for lokallagsarbeid, med fokus på søknadsskriving og styreweb. 
 
Det blir eit seminar om Landskappleiken og Landsfestivalen med eit blikk framover - med fokus på at arrangementa skal vere møteplassar på tvers av generasjonar. Det blir her presentasjon av det arbeidet som har vore gjort i arbeidsgruppa leiar av Kari Nilssen, som har hatt følgande oppgåve og mandat: Arbeidsgruppa skal finne og drøfte konkrete problemstillinga angåande LK og LF i ljos av eit styrka fokus på barn, ungdom og unge vaksne og med eit blikk fram i tid. Kva er viktig i programmet og gjennomføringa av LK og LF for at barn, ungdom og unge vaksne i enda større grad skal ha desse arrangementa som viktige og naturlege møteplassar i løpet av året? Program, arenaer, kveldsarrangement og -dans, mønstring, osb. Korleis skal LK og LF klare å foredle og utvikle seg som arrangement der framleis det å vere ein møteplass på tvers av generasjonar står i høgsetet?  
 
Innkalling og sakliste vert sendt inn i februar. Vel møtt til Landsmøtet 2025. 
 
SILJE ONSTAD HÅLIEN SOM ÅRETS AMBASSADØR FOR DANSENS DAGER 2025
 
Dansar og koreograf Silje Onstad Hålien er ambassadør for Dansens Dager 2025. Dette er ei stor ære! På Dansens Dagar er alle dansetypar representert, og det er stor stas at det folkedans som står i fokus i år. I samband med å vere ambassadør har Silje koreografert ein Dansens Dagar-dans - som vi håpar vil gå som ein farsott gjennom landet gjennom heile året. Her har Silje gått saman med spelmannen Erlend Viken, der han har komponert ein ny Dansens Dagar-slått. Vi gler oss over at folk over heile landet får oppleva folkedans gjennom det komande året. 
 
DEXTRA-UTLYSING OG ANDRE TILSKOTSORDNINGAR
 

Sidan 2017 har FolkOrg fått midlar frå Dextra Musica og Sparebankstiftelsen, og vi lyser no ut ny runde med rekrutteringsmidler til større prosjekt innan folkemusikk og folkedans for barn og unge. Søknadsfristen er 31. januar, du kan lese meir om utlysinga og sende inn søknad her: Utlysing rekrutteringsmidler Dextra Musica.

Vi ser at det er fleire og fleire lag som nyttar seg av dei mange tilskotsordningane som finns. 24. februar er det søknadsfrist for kompensasjon av TONO-utgifter for lokallag og områdelag. Etter det kjem FolkOrg sitt Aktivitetstilskot, denne ordninga har søknadsfrist 15. april 2025. Følg med jamt og trutt inne på nettsidene til FolkOrg her for info om dei ulike støtteordningane. Under Landsmøtet 2025 kjem vi til å ha eitt seminar/kurs med fokus på organisasjonsarbeid og søknadsskriving. 

Vi har også nett fått vite at ordninga Økt deltakelse i musikkorganisasjonene vidareførast til 2025. Dette gjer at vi truleg også i 2025 kan gje tilskot til lokallaga som kan støtte juniorar som vil reise og stille på LK og LF. Vi kjem attende med meir info om dette utpå våren. 

BLADET FOLKEMUSIKK

Vi i FolkOrg vonar flest mogleg av medlemmene våre held bladet, og på denne måten støtter opp om det journalistiske arbeidet på folkemusikk- og folkedansfeltet. Som medlem får du eit heilt års abonnement for berre 400 kr - det meiner vi er ein GOD pris for fire eksemplar av eit innhaldsrikt høgkvalitetsblad om folkemusikk- og folkedansfeltet. Gå inn her for å tinge.  
 
Kva med å gje bort eit abonnement som gåve? Ta kontakt med Jorun for ordning av dette: post@folkorg.no.
 

LOKALLAGSKAFFI 

FolkOrg ønsker å skapa eit tettare samarbeid og dialog mellom sentralleddet og lokallaga i FolkOrg. Vi inviterer no til ei ny runde med digital lokallagskaffi. På lokallagskaffien ønskjer vi å høyre om korleis det står til rundt omkring i lokallaga, og vi vil òg nytte høve til å informere om nyhende og aktuelle tema for lokallaga.

Lokallagskaffi foregår på Teams der vi sjølv tek med oss kvar vår kaffikopp og pratar uformelt om ulike tema. Vi ynskjer at dette skal vere eit forum kor styremedlemmar, og medlemmar forøvrig, kan møte kvarandre og dele erfaringar.

Vårens datoar:

  • Onsdag 12. februar kl. 17.00 - Kulturrom
  • Torsdag 13. mars kl. 19.30 - Norsk senter for folkemusikk og folkedans
  • Onsdag 2. april kl. 17.00 - StyreWeb

FOLKELARM 2025

Folkelarm er ein viktig møteplass for heile folkemusikkmiljøet. Det er dansefest, konsertar, seminarar, workshops, dansekurs og Folkelarmprisen. I år blir det 13.- 16. november i 2025, på Riksscenen i Oslo. For lokallaga håpar vi mange kjem på rekrutteringsseminaret som blir 15. november. Dette er ei veldig nyttig samling for alle lokallag som ynskjer å få tips og gode råd om rekrutteringsarbeid. Folkelarmprisen er på kvelden same dagen. 

Sett av helga! 

Merk: Utlysinga for å søke om å bli showcaseartist kjem nå i februar med frist 3. mars.

DIGITALE MØTER FOR YRKESUTØVARAR 

FolkOrg ynskjer å samle yrkesutøvarmedlemmene til faste digitale møter. Tema for møtene kan sendast til: annhelen@folkorg.no. Vårens datoar:

  • Tysdag 4. februar kl. 17.00 - med presentasjonar av MØST og Music Norway 
  • Tysdag 4. mars kl. 13:00 - med presentasjonar av Creo og NODA
  • Tysdag 8. april kl. 17.00 - tema kjem! 

Meir info og påmelding her. 

LAST NED GNIST-APPEN - OG MEDLEMSFORDELER

I GNIST-appen ser du medlemsbeviset ditt, og finn sjølvsagt medlemsnummeret ditt her. Du kan også oppdatere epostadresse osv. Vi får ganske mange feilmeldingar ved utsending av epost til medlemmene våre, så fint om du kan gå gjennom og sjå at kontaktinfo er korrekt: Gå på meny-knappen oppe til venstre inne i appen (den med tre streker). Så trykker du på “Profil”, deretter oppdaterer du epost-adressa di. Jo fleire som gjer denne oppdateringa, jo betre for både oss sentralt, men også for lokallaga som også kan nytte StyreWeb til å sende ut meldingar.

Det er også viktig at lokallagene legg inn styremedlemmer i laget i Styreweb. På denne måten får vi i FolkOrg oversikt over kven vi skal ta kontakt med dersom det er noko, og at styremedlemmene får den riktige informasjonen og dei riktige invitasjonane.  

Vi nyttar høvet og minnar om alle medlemsfordelane som du har ved å vere medlem i FolkOrg. Treng du tilgang til eit noteprogram? Ynskjer du å prøve The Folk Music Academy? Sjekk ut alle medlemsfordelene våre her her. 

Har du eit forslag til gode medlemsfordeler? Send oss gjerne på post@folkorg.no.

KVEN VIL ARRANGERE LF OG LK?

Landskappleiken og Landsfestivalen i gammaldansmusikk skal vere gode møteplassar for song, spel og dans, det skal vere mønstring og tevling og dansefesten skal stå i høgsetet. I åra framover treng vi framoverlente, engasjerte og dyktige arrangørar. Nå har FolkOrg lyst ut arrangementa for 2027, 2028 og 2029. Er ditt lokallag ein aktuell arrangør? Frist for å søke er 3. februar. Sjå meir info her. 

SMÅNYTT SIDAN SIST

FolkOrg har gjeve innspel både på høyringa om ny kulturlov og til endringa i lov om momskompensasjon. Seinare i vår skal vi bidra på innspel om forskrifta om dei regionale kulturfonda. Dette fondet vonar vi blir eit godt tilskot til regional kulturaktivitet. 

Glåmos spellmannslag feirer 75 år i år, og kvar dag (!) vert det lagt ut ein slått på Fjelljom sine sider. Så kvifor ikkje starte kvar dag med ein pols? Følg med her: Glåmos-musikk kvar dag.

I desse dagar arbeidast det hardt og mykje med ulike prosjekt og nettsider knytt til både LK, LF og Folkelarm. Sjølv om det ligg langt fram i tid, så er arbeidet godt i gang. Dei lokale arrangørane på Oppdal og i Eidfjord er i full drift og det later til å bli to fantastisk flotte arrangement! I år blir det eit ekstra fokus på dei gode arenaene for den sosiale dansen - både Landskappleiken og Landsfestivalen er jo årets største møteplassane for den sosiale dansen. Så det ynskjer vi arbeide ekstra med! 

Til dei som ikkje har sett det før, så ligg årsmeldingane for FolkOrg ute her. Der ligg også det ganske omfattane årsmeldinga frå jubileumsåret 2023. Denne årsmeldinga samt årsmelding for 2024 vil bli gjennomgått på Landsmøtet i 2025.

Vi i FolkOrg er der for å rådgje og vegleie både enkeltmedlemar og lokallaga. Ta kontakt om det er noko. Kontaktinfo finn du her.